Казахстан улс олимпийн аваргадаа 250 мянган ам.доллар амлалаа
Улс орнууд “Лондон-2012″ олимпийн медалийг тус бүртээ үнэлээд эхэллээ.
ОХУ Лондонгийн олимпоос алтан медаль хүртсэн тамирчиндаа дөрвөн сая рубль буюу 130 мянган ам.доллар өгөхөөр шийдвэрлэжээ. Харин мөнгөн медаль хүртвэл 82.5 мянган ам.доллар, хүрэл медаль хүртвэл 56 мянган ам.доллар тус тус олгоно хэмээн амлаад байна. Тус улс өмнө нь олимпийн аварга, олимпоос медаль хүртсэн тамирчдадаа азын дугаартай автомашин, байр, орон сууц олгож байсан удаатай. Харин энэ удаад мөнгөн шагнал амлаад байна. Үүнийг нь оросууд бусад орнуудынхтай харьцуулбал бага мөнгө гэж үзэж байгаа гэнэ. Оросын томоохон пүүс компаниуд олимпийн аварга болсон тамирчдад машин тэрэг, байр сууц, гадаадад олон сар аялах эрхийн бичиг гээд олон бэлэг өгөх тухайгаа яриад эхэлсэн аж.
АНУ 2012 оны олимпоос медаль хүртсэн тамирчдад өгөх мөнгөн шагналаа тодорхой мэдээлээгүй байгаа ч ОХУ болон БНХАУ-ын жишгээр тамирчдаа байлах болов уу гэж олон улсын ажиглагчид үзэж байгаа юм. Америкчуудын зарим нь “Бид олимпийн аваргаа хятадуудаас дутахааргүйгээр урамшуулах ёстой” хэмээн үзэл бодлоо илэрхийлжээ. Одоогоор тамирчдадаа хамгийн их мөнгө амлаад буй улс нь Казахстан болоод байна.
Казахстаны Биеийн тамир, спортын газар ирж буй олимпод амжилт гаргах тамирчдыг хэрхэн шагнаж урамшуулах тухайгаа албан ёсоор зарлалаа.
“Лондон-2012″-оос алтан медаль хүртвэл 250 мянган ам.доллар, мөнгөн медаль хүртвэл 150 мянган ам.доллар, хүрэл медаль хүртвэл 75 мянган ам.доллар тус тус өгнө гэнэ. Түүнчлэн шагналт дөрөвдүгээр байрт шалгарвал 30, тавдугаар байрт орвол 20, зургадугаар байрт орвол 10 мянган ам.доллараар шагнах ажээ.
Япон улс 2011 онд гамшигт нэрвэгдэж, эдийн засгийн байдал хүндэрсэн ч олимпод амжилт гаргах тамирчдаа өмнөх жишгээр урамшуулахаа мэдэгдээд байгаа юм.
Харин Монгол Улс “Лондон 2012″-оос медаль авчирсан тамирчдаа хэрхэн шагнах тухайгаа албан ёсоор мэдэгдээгүй байна.
2008 оных шиг олимпийн аваргыг 120 сая, мөнгөн медальтныг 60 сая, хүрэл медаль хүртсэн тамирчныг 30 сая төгрөгөөр шагнана гэвэл маргаантай зүйл гарч мэдэх юм.
“Бээжин 2008″-ын дараа олимпоос медаль хүртсэн тамирчид Засгийн газрын тогтоолын дагуу дээрх мөнгөн шагналыг авсан ч элдэв янзын татвар, татаас, хандивт багагүй хувийг нь суутгуулаад үлдсэн хэсгийг нь арайчүү гартаа авсан. Түүнээсээ анхны багш, гарын багш, бүр анхны анхны багш дасгалжуулагч гээд олон хүнд хувь хүртээсэн. Дасгалжуулагч нь хэл ам хийж, гомдоллож байж тамирчнаасаа мөнгө авсан тохиолдол ч гарсан. Түүгээр ч барахгүй төдөн кг алт өгнө, жилийн хүнсний хэрэгцээг нь хангаж өгнө, тусална гэсэн элдэв амлалтаа манай пүүс компаниуд биелүүлэлгүй олимпийн медальтнуудыг араасаа гүйлгэж, байгууллагынхаа хаалгыг мөн ч олон татуулсан даа. Зарим нь одоо хүртэл амласнаа өгөөгүй юм билээ.
Монголын тамирчин олимпоос хүрэл медаль хүртвэл 30 сая төгрөгөөр шагнуулна гэж байгаа нь Казахстан улсын олимпийн шагналт байрт орсон тамирчных нь гавьяатай тэнцэх нь.
Монголын олимпийн аварга болж 120 сая төгрөг авсан нэр зүүж байхаар Казахстаны иргэн болоод дараагийн олимпод түрүүлээд 250 мянган ам.доллар, түүнээс ч илүү долларын шагнал хүртвэл амьдрал ахуйд минь нэмэртэй гэх бодол өсвөр, залуу үеийн тамирчдад төрж юуны магад. Гадны улсын иргэн болсон тамирчид ихэнхдээ л иймэрхүү шалтгаанаас үүдэн харь орны нэрийн өмнөөс олимпод өрсөлддөг.
“Аварга болчихвол ард минь бөөн мөнгө намайг хүлээж байгаа” гэж бодсон тамирчин олимпийн дэвжээнд итгэлтэй, хурдтай “үзэлцэхээс” яах юм. Ийм болохоор манайхан тамирчдадаа сэтгэлд нь гал асааж итгэлийг нь нэмэх хэмжээний мөнгөн шагнал өгнө гэдгээ одооноос дуулгаж, компани, байгууллагууд боломжоо харж юм амлах нь зүйтэй байх шүү.
Д.САРУУЛ
Олимпийн алтан медаль нь 85 мм голчтой, долоон мм зузаан, 375-400 грамм жинтэй.
URL:
