МАН, АН-ын Олон улс дахь нэр хүндийн ялгаа

“Монгол Улс олон улсын хөрөнгө оруулагчдыг татах гэж цөхрөнгөө барж байна”…

Энэ бол Швейцарийн Холбооны Улсын Давос хотноо зохион байгуулагдсан Дэлхийн эдийн засгийн 46 дугаар чуулга уулзалтад оролцсон Германы бизнесмэний жиргэсэн жиргээ. Монгол Улсын нэр хүнд сүүлийн дөрвөн жилд гадаадад ингэж л үнэлэгдэж байна. Ерөнхий сайд нь гадаадад айлчлахдаа ч гуйлга гуйдаг, Ерөнхийлөгч нь гадаадад айлчлахдаа ч гуйлга гуйдаг тийм л ядуу улс болчихож, эх орон минь… Сүүлдээ аргаа бараад ирсэн зочид, гийчид төлөөлөгчдөөсөө гуйлга гуйдаг болсон байна. Нэг ёсондоо олон улсын хүрээнд Монгол Улс айлын шоовдор хүүхэд шиг ад үзэгдэх болжээ. Биднийг ийм замд хэн хөтөлсөн бэ?

Шалдан хүүхэн Монголыг сайхан харагдуулахгүй буюу Ерөнхийлөгчийн тэнэглэл.

Давос хотыг “дайлаар мордсон” эрхэм Ерөнхийлөгч бүрэлдэхүүндээ “Гурван охин” хамтлагийг багтаасан нь үнэндээ л тэнэглэл байлаа. Чуулга уулзалтын хүрээнд “Монголын үдэш” арга хэмжээ зохион байгуулж “Гурван охин” хамтлаг “бут” авсан байна. Гэхдээ нөгөө утгаараа… Уг нь “Монголын үдэш” урлагийн арга хэмжээг сонирхохоор ирсэн гадаад, дотоодын төлөөлөгчид язгуур урлагийн тоглолт үзэх байх гэж бодсон ч тэгсэнгүй. Монгол хувцастай гурван нөхөр нээлт хийсэн болоод тайзнаас бууж “Гурван охин” хамтлаг нүцгэн шахуу гарч ирж цаг гаруй хугацаанд олны нүдийг “хужирлажээ”. Сүүлдээ залхсан төлөөлөгчид чихээ дарж байгаа харагдана лээ. Хэдий Монгол Улсын Ерөнхийлөгч нь “ардчилсан” тодотголтой ч гэсэн гадаадад Монголын нэр хүндийг ингэж унагаж болохгүй. Ядаж л язгуур урлагийн хамтлагаасаа авч явах ёстой байсан юм хэмээн урлагийнхан “жиргээд” эхэллээ. Ерөнхийлөгчийн эл тэнэглэл Монгол Улсын нэр хүндийг олон улсад улам л унагасаар… Эрхэм Ерөнхийлөгчөө шалдан хүүхнүүд олны өмнө дууллаа гээд Монгол сайхан харагдахгүйг санахад илүүдэхгүй ээ…

Тив алгассан гадаад бодлого буюу АН-ын тэнэглэл.

Америкаас өөр улс мэддэггүй эрх баригчдын гадаад бодлогын уршгаар хөрш хоёр орон маань манай улсаас нүүрээ буруулаад удаж буй. Тив алгасч хөгжил ярьсан АН-ынхан эцэстээ шалдаа бууж хоёр хөршөө царай алдсан ч тусыг эс олсон. Ер нь яаж ч бодсон хоёр том гүрний дунд оршин буй жижигхэн Монгол Улс Хятад, ОХУ хоёртой харилцаагаа сайжруулж байж гуравдагч хөрштэй учраа олно. Өнөөдөр хөрөнгө оруулагчид Монголыг сонирхохгүй байгаа шалтгаан нь эрх баригчидтай шууд холбоотой. Эрх баригчдын фракцаараа хуваагдсан улс төр, тогтворгүй бодлого, улс төрийн явуургүй шоуны үр дүн нь Монгол Улсын гадаад дахь нэр хүндийг үнэгүйдүүлж байна. Тэгвэл…

М.Энхболдын ОХУ дахь айлчлал буюу МАН-ын зангараг.

…Тэгвэл сөрөг хүчний намын дарга М.Энхболд Нэгдсэн Орос намын даргын урилгаар ОХУ-д албан ёсны айлчлал хийхээр мордлоо. Энэхүү чимээтэй давхцан ОХУ-ын дум их өрийн үлдэгдэл 174 сая ам.долларыг “0”-лэхээр боллоо гэсэн чихэнд чимэгтэй мэдээ дуулдах болов. Бүр цаашилбал анхны хэлэлцүүлгээр ДУМ-ын гишүүдийн дийлэнх олонхи дэмжсэн байна. Тодруулбал, 385 депутатаас 47 депутат л эсрэг санал өгсөн ажээ. Хэлэлцээ ёсоор 174.2 сая ам.долларын 97 хувийг чөлөөлбөл Монгол Улс 3.8 сая ам.доллар л төлнө гэсэн үг. Жилээр биш, сараар биш, өдрөөр биш, цаг минутаар хүндэрч байгаа эдийн засагтай манайх шиг улсад бол үнэхээр баяртай мэдээ. ОХУ-ын ДУМ-ын дээрх шийдвэрийг олон улсын шинжээчид МАН-ын дарга, УИХ-ын дэд дарга М.Энхболдын ОХУ-д хийж буй албан ёсны айлчлалтай холбон тайлбарлаж байна. Тэд “ОХУ-ын ДУМ Монгол Улсад өгөөмөр загнаж байгаа нь сөрөг хүчний намын даргын айлчлалтай шууд холбоотой” хэмээн бичжээ. Цаашлаад өнөөгийн сөрөг хүчин удахгүй болох сонгуульд ялалт байгуулбал ОХУ гэлтгүй олон улс дахь Монгол Улсын нэр хүнд огцом өснө гэж ажиглагчид дүгнэж байна.

С.ОГТОРГУЙ