Анхан шатны шүүхийн тогтоолын зарим заалтыг нийслэлийн шүүх өөрчилжээ
“ТВ9″ ТЕЛЕВИЗИЙН ХУУЛЬ БУСААР ОЛСОН 119 САЯ 534 МЯНГА 302 ТӨГРӨГИЙН ЭД ХӨРӨНГИЙГ ХУРААХ БОЛЖЭЭ-
Албан тушаалаа урвуулан ашиглаж улсад их хэмжээний хохирол учруулсан хэмээн МАХН-ын дарга Н.Энхбаяр анхан шатны шүүхээс дөрвөн жилийн хорих ял сонссон юм. Давж заалдах шатны хурал нийслэлийн шүүхэд болж, анхан шатны шүүхийн шийдвэрийг хэвээр баталсан билээ. Нийслэлийн шүүх хэвлэлийн хурал хийж давж заалдах шатны шүүхийн шийтгэх тогтоолыг танилцуулсан юм. Ингэхдээ анхан шатны шүүхийн шийтгэх тогтоолын зарим заалтыг нь өөрчилж шийдвэрлэсэн байна. Анхан болон завж заалдах шатны шүүхийн тогтоолыг харьцуулан тавилаа. Тогтоолын өөрчлөгдсөн зарим заалтыг эндээс харна уу.
АНХАН ШАТНЫ ШҮҮХИЙН ТОГТООЛ
Анхан шатны шүүхээс Н.Энхбаярыг бусадтай бүлэглэн төрийн албан тушаалын байдлаа урвуулан ашиглаж аж ахуйн нэгж байгууллагад онц их хэмжээний хохирол учруулсан, онц их хэмжээний хөрөнгө завшсан гэмт хэрэг үйлдсэн гэм буруутайд тооцож, түүнд 25 сая төгрөгийн эд хөрөнгийг хурааж, дөрвөн жилийн хорих ял оноосон юм. Харин Д.Чулуунбаатарыг бусадтай бүлэглэн эд хөрөнгө завшиж, бусдад онц их хэмжээний хохирол учруулсан гэж Эрүүгийн хуулийн 150 дугаар зүйлийн 150.3-т зааснаар нийт 10 сая төгрөгийн эд хөрөнгийг хурааж, хоёр жил нэг сарын хорих ял эдлүүлэхээр болсон.
Ж.Мягмаржаргалыг бүлэглэн бусдын эд хөрөнгийг завшиж, онц их хэмжээний хохирол учруулсан мөн давтан үйлдлээр мөрийтэй тоглоом тоглосон гэм буруутайд тооцож, Эрүүгийн хуулийн 150 дугаар зүйлийн 150.3, 243 дугаар зүйлийн 243.2-т зааснаар нийт 25 сая төгрөгийн эд хөрөнгийг хурааж, гурван жил зургаан сарын хорих ял оногдуулсан юм. Мөн Д.Дуламсүрэнг бусадтай бүлэглэн төрийн албан тушаалтан албаны эрх мэдэл буюу албан тушаалын байдлаа урвуулан ашиглаж аж ахуйн нэгж байгууллагад онц их хэмжээний хохирол учруулсан, онц их хэмжээний хөрөнгө завшсан гэмт хэрэг үйлдсэн гэм буруутайд тооцож Эрүүгийн хуулийн 150 дугаар зүйлийн 150.3, 263 дугаар зүйлийн 263.2 дахь хэсэгт зааснаар ял оногдуулсан ч 2009 оны Өршөөлийн тухай хуулийн 4.1.2, 4.4 -т заасны дагуу түүнд оногдуулсан үндсэн болон нэмэгдэл ялыг бүхэлд нь өршөөн хэлтрүүлсэн юм.
Иргэний хуульд заасны дагуу Н.Энхбаяраас 54 сая 534 мянга 302 төгрөгийг гаргуулан Гандантэгчинлэн хийдэд, мөн Н.Энхбаяр, Ж.Мягмаржаргал нараас тус бүр 982 сая 577 мянга 024 төгрөгийг гаргуулан Эрдэнэт үйлдвэрт олгон, “ТВ9″ телевизийн хууль бусаар олсон эд хөрөнгийг хурааж улсын орлогод оруулахаар шийдвэрлэсэн. Анхан шатны шүүхийн энэ шийдвэрийг ялтан болон өмгөөлөгч нарын гаргасан давж заалдах гомдлоор Нийслэлийн шүүх давж заалдах шатны шүүх хуралдаанаар хянан хэлэлцэж дараахь шийдвэрийг гаргав.
ТОГТООЛООР ӨӨРЧЛӨГДСӨН ЗАРИМ ЗААЛТ
Нийслэлийн шүүх Н.Энхбаяр, Д.Чулуунбаатар, Д.Дуламсүрэн, Ж.Мягмаржаргал нарын гэм буруу нь хэрэгт цугларсан нотлох баримтуудаар тогтоогдсон, хэргийн талаар шүүх тогтоол гаргахад чухал ач холбогдолтой байж болох бүхий л байдлыг бүрэн шалгаж тогтоосон хэмээжээ. Тэгээд Эрүүгийн хуулийг зөв хэрэглэсэн, гэм буруугийн талаар хийсэн дүгнэлт хэргийн жинхэнэ байдалтай нийцсэн, анхан шатны шүүхийн шийдвэр хууль ёсны үндэслэлтэй гарсан байна гэж дүгнэв. Ингээд шийтгэх тогтоолын тогтоох хэсэгт “ТВ9″ телевизийн хууль бусаар олсон орлогыг хураана” гэж анхан шатны шүүх ерөнхийлөн заасныг өөрчилж, “ТВ9 телевизийн хууль бусаар олсон 119 сая 534 мянга 302 төгрөгийн эд хөрөнгийг хураасугай” гэж өөрчилсөн байна. Мөн “Өргөө” зочид буудалтай холбоотой үйлдэлд нь анхан шатны шүүхээс гэм буруутайд тооцож ял шийтгэсэн боловч уг үйлдэлтэй холбоотой Нийслэлийн Иргэдийн Төлөөлөгчдийн Хурлын тэргүүлэгчдийн тогтоол болон Нийслэлийн Засаг даргын захирамжийг хүчингүй болгоогүй нь буруу болсон гэж үзжээ. Иймд НИТХ-ын тэргүүлэгчдийн 2007 оны аравдугаар сарын 17-ны өдрийн 188 дугаар тогтоол, Нийслэлийн Засаг даргын 2007 оны арваннэгдүгээр сарын 07-ны өдрийн 555 дугаар захирамжийг тус тус хүчингүй болгох тухай заалтыг нэмж оруулан шийтгэх тогтоолын бусад заалтыг хэвээр үлдээж, ялтан болон тэдгээрийн өмгөөлөгчдийн давж заалдах гомдлыг хэрэгсэхгүй болгожээ. Мөн Н.Энхбаяр нарыг дөрвөн хэрэгт буруутган шалгаж гэм буруутай нь тогтоогдсон гэж хоёр шатны шүүх үзсэн юм. Тухайлбал,
Нэгт, УИХ дахь цөөнхийн бүлгийн даргаар ажиллаж байхдаа 119.534 мянган төгрөгийн тоног төхөөрөмжийг 2000 оны зургадугаар сарын 16-нд албан тушаалаа урвуулан ашиглаж, хувьдаа завшин Гандантэгчинлэн хийдэд онц хэмжээний хохирол учруулсан.
Хоёрт. Монгол Улсын Ерөнхийлөгчийн албыг урвуулан ашиглаж, тухай нийслэлийн Засаг даргаар ажиллаж байсан Ц.Батбаяр, НИТХ-ын тэргүүлэгчдийн даргаар ажиллаж байсан Н.Болормаа, нийслэлийн Өмчийн газрын орлогч даргаар ажиллаж байсан Д.Дуламсүрэн нартай бүлэглэн “Өргөө” зочид буудлыг хувьчлан нийслэлд онц их хэмжээний хохирол учруулсан.
Гуравт. Нийслэлийн Засаг дарга бөгөөд нийслэлийн өмч хувьчлах комиссын дарга Т.Билэгт, иргэн До.Чулуунбаатар нартай бүлэглэн “Улаанбаатар таймс” сонины байрыг өөрийн дүү Н.Энхтуяагийн “Медиа Холдинг” ХХК, До.Чулуунбаатар нарын нэрээр худалдан авч улмаар өөрийн үүсгэсэн байгуулсан компанид охин компани болгон завшиж, нийслэлд онц их хэмжээний хохирол учруулсан нь тогтоогдсон.
Дөрөвт. Монгол Улсын Ерөнхийлөгчийн албан тушаалын байдлыг урвуулан ашиглаж, “Эрдэнэт” үйлдвэрийн захирал, худалдааны асуудал хариуцсан орлогч захирал, “Хэнлон” компанийн захирал Ж.Мягмаржаргал нартай бүлэглэн гурван тэрбум 930 сая төгрөгийг завшиж, “Эрдэнэт” үйлдвэрт онц их хэмжээний хохирол учруулсан гэж үзсэн юм.
Давах шатны шүүх дээрх дөрвөн бүлэг хэргийг хэвээр нь батлаад харин шийтгэх тогтоолын тогтоох хэсэгт зарим өөрчлөлтийг оруулж ийн шийдвэрлэсэн байна.
Г.ЯЛГУУН
Тус мэдээллийг бусад хэвлэл мэдээллийн байгууллага хуулбарлан нийтлэхийг ХАТУУ хориглоно.
ӨДРИЙН СОНИН-МЭДЭЭ.МН
URL: