Rio Tinto: 2020 онд “Оюу Толгой” төслийн ил уурхайгаас олборлосон зэсийн хэмжээ өмнөх оноос 2 хувиар өссөн
“Оюу Толгой” төслийн хөрөнгө оруулагч “Rio Tinto” компани 2020 оны үйл ажиллагааны тайлангаа танилцууллаа. 2020 онд тус компани “Оюу Толгой”-ийн гүний уурхайн бүтээн байгуулалтын ажилд нэг тэрбум ам.долларын хөрөнгө оруулсан байна.
Энэ нь Монгол Улсын гадаадын шууд хөрөнгө оруулалтын дийлэнх хувийг эзэлж байна. Гүний уурхайн бүтээн байгуулалтын ажлыг дуусгаж, олборлолтыг эхлүүлснээр зэсийн үйлдвэрлэл нь 2028-2036 онд жилд 480 мянган тонн олборлох боломжтой болно гэж тайландаа мөн дурджээ.
2020 онд “Оюу Толгой” төслийн ил уурхайд 149.6 мянган тонн зэс олборлосон байна. Энэ нь өмнөх оны дүнгээс хоёр хувиар өссөн үзүүлэлт болов. Үүнд олборлолт хүдрийн агуулга ихтэй үе рүү шилжсэн нь голлон нөлөөлсөн гэж тайлбарлажээ.
Хамгийн сүүлд “Rio Tinto” групп “Оюу Толгой” төслийн талаарх Монгол Улсын Засгийн газрын саналын дагуу далд уурхайн бүтээн байгуулалт, санхүүжилтийн гэрээг шинэчлэхэд бэлэн байгаа тухай ойрын эх сурвалжийн мэдээллийг “Reuters” дамжуулсан юм.
Дубайн гэрээ буюу далд уурхайн санхүүжилтийн төлөвлөгөөг хоёр талын тохиролцоогоор цуцалж, нөхцөлийг нь сайжруулан дахин гэрээ байгуулах саналыг Монгол Улсын Засгийн газар “Rio Tinto”-д тавиад байна. Энэхүү төлөвлөгөөний дагуу Монгол Улс 2051 он хүртэл ямар нэгэн ногдол ашиг хүртэхгүй, 22 тэрбум ам.долларын өртэй үлдэнэ гэж ЗГХЭГ тооцоолжээ. Гэрээний нөхцөлийг сайжруулахтай холбоотой УИХ-ын 92 дугаар тогтоолын дагуу Засгийн газрын ажлыг хэсэг яриа хэлэлцээнд оролцож байгаа юм.
Б.Батцэцэг
Холбоо барих: battsetseg.b@bloombergtvmongolia.com
minjma.g@bloombergtvmongolia.com
URL:
