Хошин шог шиг Монгол мину

Хошин шогийн продакшнууд хэзээ ч моодноос гарахгүй нь. Монгол ядуу, иргэд оюуны хоосролтой байгаа цагт л лав. Сонгууль боллоо, шинэ бүтээгдэхүүн гарлаа, шинэ үйлчилгээ нэвтэрлээ бүх сурталчилгаанд нь хошин шогийнхон эзэн суучихсан. “Шуналтай, арчаагүй, атаархуу, завхай, үл бүтэх, хорчин, нэгнээ доошоо хийсэн хошин шогийнхны сурталчилгаанаас бид залхаж байна. Эрэлтээ мэдрээч ээ, захиалагчид аа” гэж хэлбэл “Монголын нийт масс ийм л сурталчилгаанаас ойлголт авдаг, эрэлт, нийлүүлэлтийн хуулийг л дагаж байна” гэх байх л даа.

Бизнесийнхэн, улстөрчид, томчууд ард түмнийг ийм л нүдээр харж байна. Ард түмэнд хошин шогийнхны матарласан сурталчилгаа л яг тохирно. Биднийг харах тэдний нүд ердөө л энэ. Ямарсайндаа л ОУВС-аас зээл авахдаа дахиад л ард түмнийг матарлаж байхавдээ. Тэдний үзэж байгаагаар бид илжиг шиг зүтгээд л өдрийнхөө хоолноос өөр юм бодохгүй байх нь илүү ашигтай. Яг л манкурт боолууд шиг. Тэдний хий гэснийг хийж, үз гэснийг нь үзээд л. Ав гэснийг нь авч, ид гэснийг нь идээд л. Одоо бүр өр төл гэхэд нь төлдөг болж хувирч байх шиг байна даа. Хошин шог шиг л амьдрал өрнөж байна даа, Монголд минь.

У.Жанцан

Цензургүй.мн