-Ноён уулаа аврахаар “өлсгөлөн” зарлаад байгаа бүлгэмийн автомашиныг галдан шатаажээ

Манай улс эдийн засгийн хөгжлийн гол хөшүүрэг бол уул уурхай гэж хардаг болсноос хойш уул уурхайтай холбоотой аливаа анхаарлын төвд орсон. Өнөөдөр томоохон орд газруудын дийлэх хувь нь гадныхны мэдэлд очсон тул уул уурхайнуудаас Монголчуудад унах ашиг байхгүй, алдагдал ихтэй байдаг болсон нь нууц биш. Үүнээс болоод Монголын эдийн засаг сөхрөхдөө тулсан нь туйлын үнэн.

Гэтэл  Сентерра гоулд компани Ноён уулын Гацууртын ордыг ашиглахын тулд бүхий л аргаа хэрэглэж, манай гишүүд ч тэдний гар хөл болон дэвсээр буй.
Үүний нөлөөгөөр Сэлэнгэ аймгийн Мандал сумын нутаг дахь Сентерра гоулд компанийн лицензтэй талбай, Гацууртын ордыг ашиглах олборлолт явуулах, эсэх асуудал Улс төрийн хүрээнд бараг шийдэгдэж байна.

“Урт” нэртэй хуулийн хязгаарлалтын бүсэд тус компанийн талбайн зарим хэсэг орсон байсныг уг хуулиас гаргаж, стратегийн ордод нэг л мэдэхэд оруулчихсан байсан. Харин одоо Төрийн хувь хэмжээг хэдээр тогтоох вэ гэдэг асуудал яригдаж буй. Ерөнхийдөө улс төрийн намын бүлгүүд болон байнгын хороогоор Төрийн эзэмшилд 20 хувийг байлгахыг дэмжиж буйгаа мэдэгдээд байгаа.

Тэгвэл үүнийг ард иргэд хүчтэй эсэргүүцэж, өдөр хоног дараалан жагсаал цуглаан, суулт хийсээр байна. Тэд Ноён уулыг сэнгэнүүлчих эсрэг боломжит бүх аргаа хэрэглэж, эхлээд жагсаал  цуглаан, дараа нь суулт, одоо бүр өлсгөлөн зарлаад эхэллээ. Энэхүү өлсгөлөн нь төрийн түшээд нар “Ноён уул, Гацууртын орд”-ыг ашиглуулахгүй гэсэн хариуг өгтөл үргэлжлэхийг өлсгөлөнд оролцогчид хэлж байна.

Өлсгөлөнд  Ноён уулаа аврах хөдөлгөөн, орон нутгийн иргэдийн төлөөлөл, иргэний нийгмийн хөдөлгөөн,  Үндсэрхэг үзэлтнүүдийн бүлгэм , бөө гээд Монголын бүхий л иргэдийн төлөөлөл болсон хүмүүс оролцож байна.

Гэтэл өчигдөр 21.00 цагийн үед “Босоо хөх Монгол” бүлгэмийн машиныг бензин цацаж шатаасан хэрэг гарлаа. Энэхүү үйлдэл нь санаатай үйлдэл байсан тухай тус бүлгэмээс мэдээллээ. Бүлгэмийн гишүүн “Нохойн наадам эхэллээ. Суулт эхлээд 58 цаг, өлсгөлөн зарлаж эхлээд 10 гаран цаг болж байхад Босоо Хөх Монгол бүлгэмийн арын албаны “Hyundai starex” маркын машиныг галдан шатаалаа..Энэ үйлдэл зорилго нэгт бидний зоригийг мохоож чадахгүй” гэжээ. Дашрамд хэлэхэд уг бүлгэмийнхэн “Ноён” уулаа аврахаар тэмцэнэ хэмээн өлсгөлөн зарлаад байгаа билээ.

Мөн өчигдрөөс тус бүлгэмийн цахим хуудас дахь дэмжигчдийн сэтгэгдлүүдийг хэн нэгэн устгаад байгаа талаар ч ярьж байсан юм.

Post by Ganzorig Gankhuyag.

Buzznews.mn

-”Ноён уулынхаа төлөө амиа өгөхөд бэлэн”гэв

Нийтэлсэн: 2015-02-13 12:59:27

Урт нэртэй хуульд нэмэлт өөрчлөлт оруулах болон “Ноён” уулын хөндийд алт олборлохыг эсэргүүцсэн “Босоо хөх Монгол” булгэм, Сэлэнгэ аймгийн Мандал сумын “Ноён уулаа аваръя” хөдөлгөөнийнхөн Хэлмэгдэгсдийн хөшөөний дэргэд суулт зарлаад гурав хонож байна. Гэвч тэдний дуу хоолой зохих хүмүүстээ хүрэхгүй байгаагаас нойтон өлсгөлөн зарлаж эхэллээ.

Тэдний төлөөлөл болох арван хүн энэ сарын 11-ний 12 цагаас өлсгөлөн зарлаж эхэлсэн бөгөөд үүнд энгийн иргэд болоод хөдөлгөөний зохицуулагчид түүн дотор өндөр настан н.Борхүү, О.Цэрэннадмид нар байгаа ажээ. Энд жагсч байгаа хүмүүс тус бүртээ 3-5 хүүхэдтэй аж. Хамгийн гол нь тэд газар нутгийнхаа төлөө амиа алдсан ч хамаагүй хэмээн гэрээслэл бичиж үлдээсэн ажээ.

Хэрэв нойтон өлсгөлөн зарлаад ямар нэг шийдэлд хүрч чадахгүй бол дараагийн үе шат буюу хуурай өлсгөлөнд шилжих болно гэдгээ мэдэгдсэн юм. Тэмцэгчид “Ноён уулаа аваръя”, “Усгүй болох гэж байж алтаар яах юм, улсгүй болох гэж байж амиар яах юм” гэсэн уриа, лоозонг эргэн тойрондоо зүүж, эсгий давхарлан дэвсч хэвтэж байлаа.

Тэд “Шөнөдөө хүйтэн хонож байгаа болохоор даардаг. Харин өдөртөө гайгүй байна” гэж байв. Мөн Гацууртын ордыг ашиглахыг эсэргүүцэгчдийн гарын үсгийг цуглуулж байв. Одоогоор 48 мянган хүн гарын үсгээ зуржээ. Тэд Засгийн газарт ердөө хоёрхон шаардлага тавьж байгаа. Нэг нь “Ноён уул”-аа аваръя, битгий хөндөөч.

Нөгөө нь “Урт нэртэй хууль”-ийг хэвзэр нь үлдээе, өөрчлөлт хийхгүй байгаач гэсэн хүсэлт. Гэтэл эдгээр санал, хүсэлтэд төр, засгаас ямар ч хариу өгөхгүй, усанд шидсэн чулуу шиг чимээгүй байгаад дургүйцлээ илэрхийлж байлаа. “Босоо хөх Монгол” бүлгэм, “Ноён уулаа аваръя” хөдөлгөөнийнхнийг УИХ-ын гишүүн Г.Уянга дэмжиж байгаагаа илэрхийлж, өлсгөлөн зарлаж байгаа хүмүүсийг хамгаалж буй хүмүүст халуун аарц, чацаргана явуулж байгаа аж.

Энэ тэмцлийг дэмжиж буй иргэд ч энэ үеэр цөөнгүй таарсан юм. Энэхүү өлсгөлөнтэй зэрэгцэн “Босоо хөх Монгол” бүлгэмийн машиныг цонхыг нь хагалан шатахуун цацаж шатаасан байна. Тус бүлгэмийн удирдах зөвлөлийн дарга Ц.Баяраа “Энэ сарын 11-ний орой 21.00 цагийн үед бидэнд дулаан хучлага авчрахаар явсан албаны “Хьюндай Старекс” машиныг галдан шатаасан хэрэг гарлаа. Дэнжийн мянгаас Баянхошуу явах шинэ зам дагуу айлын гадаа машинаа орхиод, гэрээс хучлага авахаар орох зуурт машины цонхыг нь хагалж, шатахуун цацаж гапдан шатаасан байна. Цагдаагийн, галын албад цаг алдалгүй очиж, галыг унтрааснаар автомашины тал нь шатаагүй үлдсэн гэлээ. Тэд өлсгөлөн зарлаж эхлэнгүүт машиныг шатаасан нь улс төрийн зорилготой гэж үзэж байна. Тиймээс “Ноён” Уулаа аврах тэмцлээ илүү идэвхжүүлнэ” хэмээж байлаа. Энэ үеэр “Босоо хөх Монгол” бүлгэмийн тэргүүн П.Шинжээравдантай хэсэгхэн зуур ярилцсан юм.

-Өлсгөлөн зарлаад хэр удаж байна. Хэд хоног үргэлжлэх вэ?

-Бид уух ус, гишгэх газрынхаа төлөө тэмцэж байна. Ордонд байгаа нөхөд буруу шийдвэр гаргах гэж байгааг эсэргүүцэн олон хоног суулт хийж байна. Тиймээс бид өчигдрөөс /уржигдар/ нойтон өлсгөлөн зарлаж эхэлсэн. Тэд гэсэн хоног заагаагүй. Засгийн газрийг зөв шийдвэр гаргах хүртэл өлсөлөнгөө үргэлжлүүлнэ. Хэрэв нойтон өлсгөлөн зарлаад тодорхой шийдэлд хүрэхгүй бол бид дараагийн үе шатанд шилжиж хуурай өлсгөлөн зарлах болно. “Бид асуудлыг халэлцэхээ хойшлууллаа, өлсгөлөнгөө түр зогсоочих” гэж хүүхэд аргалж байгаа шиг ярих байх. Бид хоёр асуудал дээр баттай зогсч, зөв шийдэлд хүрсэн цагт өлсгөлөнгөө зогсооно.

-Та нар зөвшөөрөл авсан уу?

-Бид тусгай зөвшөөрөл авч, холбогдох газруудад нь албан ёсоор өгсөн. Тиймээс хууль дүрмийн дагуу өлсгөлөн зарласан.

-Эрүүл мэндийн үзлэгт хамрагдсан уу. Одоогоор биеийн байдал ямар байна вэ? 

-Эрүүл мэндийн үзлэгт ороогүй. Уг нь өлсгөлөн зарласан өдрөө орох ёстой юм билээ. Гэвч бид орж амжаагүй байна. Харин өнөөдөр эрүүл мэндийн үзлэгт ор хэмээн дуудаж байна. Өлсгөлөн зарлаад 24 цагийн дараа орох гэж байна даа. Одоогоор бидний биед элдэв хүндрэл гараагүй байна. Юу ч идэхгүй байгаа боловч нойтон өлсгөлөн зарлаж байгаа болохоор ус ууж байгаа.

-“Босоо хөх Монгол” бүлгэмийн машиныг шатаасан байна. Та үүнд ямар байрь суурьтай байна вэ?

-Машиныг шатаасан нь бидний зоригийг мохоох гэсэн үйлдэл байх. Ийм янзаар бидний эх орныхоо төлөө гэсэн сэтгэл, эр зоригийг мохоож чадахгүй.

Эх орноо хайрлахгүй байгаа юм чинь эдгээр хүнийг хайрлах нь юу л бол

Иргэн А.Алтанхүү:

-Байгалийн баялгаа зарж идэх гэсэн хэсэг бүлэг хүний хийж байгаа явуургүй үйл ажиллагааг эсэргүүцэж, ийм зүйл хийж байгаад би энэ хүмүүсээр бахархаж байна. Өвлийн хүйтэнд газар нутгийнхаа төлөө гадаа хонон өнжин, хоол ундгүй байхад төрийн өндөрлөгүүд шийдвэр гаргахгүй байгаа нь хүн чанаргүй болсных биз. Төр, засаг эх орноо хайрлахгүй байгаа юм эдгээр хүнийг хайрлах нь юу л бол. Ах нь хөгшин настай хүн болохоор дэмжиж, тэтгээд хамт байж чадахгүй ч гарын үсгээ ч болов зурж, нэмэр болж байна даа. Гарын үсэг цуглуулж байгаа нь тэмцэлд нэмэр болдог юм бол бусад хүнийг ирж гарын үсэг зураарай гэж уриалмаар байна.

Эх орны газар шороо ямар үнэ цэнэтэйг бага ч гэсэн мэдрүүлэх хэрэгтэй

Иргэн Ю.Чимэд:

-Өлсгөлөн зарлаж байгаа нь зөв шүү дээ. Өөр яаж тэмцэх юм. Эрх мэдэлтнүүд нь эх орноо худалдаж идэх гэж байхад үүнээс өөр тэмцэх арга гэж юу байх вэ. Ингээд ч болов эх орныхоо газар шороо ямар үнэ цэнэтэйг бага ч гэсэн мэдрүүлэх хэрэгтэй. “Ноён” уулаар оролдож болохгүй гэдэг сануулга Чингисийн талбайд бөө нарыг бөөлж байхад харагдсан шүү дээ. Үүнийг мөнгөнд шунасан этгээдүүд ойлгохгүй байна. Би шүтлэгтэйдээ ингэж хэлж байгаа юм биш. Угаасаа Монголын уул тал, ус эзэн савдагтай гэдгийг энгийн хүүхэд ч гэсэн мэднэ шүү дээ.

М.Энхцэцэг

mgltimes.com

Ноён уулынхаа төлөө амиа ч өгөхөд бэлэн байгаа эдгээр арван иргэний амь нас алтнаас хямдхан байгаа бололтой. Өлсгөлөн зарлаад 100 цаг өнгөрөхөд нэг ч дорвитой хариу ирсэнгүй хэмээн өлсгөлөн зарлагсад ярьж байгаа юм. Арвын арван иргэний амь нас алтнаас хямдхан гэжүү Ерөнхийлөгч өө.