З.Энхболд АН-ын даргад нэр дэвшигчдэд тус бүр 1 сая төгрөгийн хандив өглөө

АН-ын даргад нэр дэвшихээр таван эрхэм өчигдөр үнэмлэхээ гардан авсан. Тэдний сонгуулийн сурталчилгаа албан ёсоор явагдаж буй. Тэгвэл АН-ын дарга З.Энхболд таван нэр дэвшигчдэд хувиасаа тус бүр 1 сая төгрөг хандивлалаа. Үүнийгээ албан ёсны пэйж хуудсаараа дамжуулан мэдэгдсэн юм.

Тэрбээр “АН даргын сонгуульд нэр дэвшигч Н.Алтанхуяг, Ж.Батзандан, Л.Гантөмөр, С.Эрдэнэ, Д.Эрдэнэбат нартаа ав адилхан 1 сая төгрөгийн хандив хувиасаа өглөө. Дүрмээ биелүүлээд шударгаар өрсөлдөөд, ялснаа хүлээн зөвшөөрөөд яваарай. Цаашдаа хамтдаа намаа бэхжүүлж, 2020 оныхоо сонгуульд амжилттай оролцож ялаад улс орноо хөгжүүлэхийг хүсэн ерөөе. Сонгууль хийхэд зардал гардаг, тэр зардлыг нэр дэвшигчдээр гаргуулах дүрмийг саяхан хуралдсан Намын их хурлаас гаргасан. Энэ нь дэнчин биш. Нэр дэвшигчээр дамжуулан өгсөн Таны хандив сонгуулийн зардалд зарцуулагдана. Нийт намын гишүүддээ эдгээр банкны данс болон нэрээр боломжын хирээр хандив өгөхийг уриалж байна” гэсэн байна.

АН-ын даргын сонгууль нэг сарын турш үргэлжилнэ. АН-ын даргад С.Эрдэнэ, Ж.Батзандан, Н.Алтанхуяг, Л.Гантөмөр, Д.Эрдэнэбат нар өрсөлдөж буй.

Б.Чимэг

zaluu.com