УИХ-д орох гэж банк дампууруулсан Б.Гарамгайбаатар Хэнтийнхнээр дахин тохуурхав

Монголын авто замын салбарыг эзэгнэж, замын тендерээс хэдэн тэрбумаар нь цохидог цөөхөн хэдэн баячуудын нэг бол “Мон­роуд”-ын захирал Б.Гарамгайбаатар. Авто замчдын холбоо гэх төрийн бус байгууллага байгуулж, түүгээрээ мөнгө угааж суудаг хэсэг хүмүүсийг толгойлдог нөхөр нь “Монроуд”-ын захирал Б.Гарамгайбаатар.

Гэтэл ашигтай гэсэн бүх­нийг хувьдаа шингээхийн төлөө төрсөн нөхөд энэ жилийн нэр дэшигчдийн дийлэнхийг эзэлж байгаа нь харам­салтай. “Нэр дэвших боловс­ролтой, мэдлэгтэй, эх ор­ноо гэх сэтгэлтэй боловсон хүчин дутагдсан биш очиж очиж Б.Гарамгайбаатар байх­даа яадаг юм бэ” хэмээн хэн­тийчүүд гоморхож байна лээ.

Тэрбээр 2008 оны УИХ-ын сонгуульд мөн л Хэнтий аймагт үзээд хүчрээгүй. Хэнтийчүүд энэ хүнд итгэл үзүүлээгүй. Итгэл үзүүлэхийг хүсээгүй гэсэн үг л дээ. Хэрэв Б.Гарамгайбаатарыг нутаг орныг нь хөгжүүлж чадна гэж итгэсэн бол дөрвөн жилийн өмнө парламентад сонгочих байлаа.

“Анод” банкнаас олон тэрбум төгрөг авч, 2008 оны УИХ-ын сонгуулийн сурталчилгаанд зарцуулсан гэдэг ч энэ нь амжилт олоогүй. Товхондоо Б.Гарамгайбаатар “Анод”-ыг дампууруулж, олон зуун хадгаламж эзэм­шиг­чийг хохирооход гол нөлөө үзүүлсэн арчаагүй бизнес­мэнүүдийн нэг. Авсан зээлээ төлж чадалгүй луу унжиж явсаар “Анод” банкийг сөхрүүлсэн гэдгийг хэн­тийчүүд байтугай монгол­чууд андахгүй.

Тодруулбал, Б.Гарам­гайбаатар “Анод” банк­наас “Монроуд”, “Ар Пи Эм”, “Дээд цэг”, “Улбаа” гэх дөрвөн компанийнхаа нэр дээр 17 тэрбум 514 сая 169 мянган төгрөг зээлжээ. Yүний долоон тэрбум гаруйг нь “Монроуд” компанийнхаа нэр дээр авсан байдаг. Харин “Ар Пи Эм” ХХК нь хоёр ч удаа зээл авсан байдаг аж. Тухайлбал, 2007 оны есдүгээр сарын 13-нд нэг тэрбум 349 саяын зээл, мөн ондоо 400 сая төгрөгийн зээл авсан байдаг аж. “Дээд цэг” компани хоёр тэрбум 800 сая, “Улбаа” компани таван тэрбум 715 сая төгрөгийн зээлтэй байв.

Гэвч тэрбээр энэхүү зээлээ төлж барагдуулалгүй байсаар “Анод” банкийг сөхрүүлсэн. Улмаар банк дампуурс­ны дараа хяналт шал­галтын комиссынхон Б.Гарам­гай­баатарын зээлийг эргэл­зээтэй зээл гэсэн ангилалд оруулж байв. Түүний “Улбаа” ком­панийн зарим зээл 2008 оны дөрөвдүгээр сар, зургаадугаар сард гарсан байсан нь Б.Гарам­гай­баатарыг “Анод”-ын мөнгөөр сонгуульд өрсөлд­сөн гэх хардлагыг улам гүнзгийрүүлсэн юм. Харин төмөр, бетон гүүрний ажил гүйцэтгэдэг “Улбаа” ком­панийг “Монроуд” буюу Б.Гарам­гайбаатар хувьч­лалаар авч, охин компаниа болгож байжээ.

Ийнхүү “Анод”-ын дам­пууралд “үнэтэй хувь нэмэр” оруулсан АН-ын ҮЗХ-ны гишүүн, Хэнтий аймгийн АН-ын дарга Б.Гарам­гайбаатар дахин сонгуульд хүч үзэж байна. Энэ удаа хэний мөнгөөр, ямар хөрөн­гөөр сонгуулийнхаа суртал­чилгааг хийж байгаа бол.

17 тэрбум төгрөг сэмхэн зохицуулчихаад шоронд орол­гүй үлдсэн түүнийг нам нь авар­сан гэхээс өөрөөр юу гэж тайлбарлах вэ. Ямартай ч “Мон­роуд” гэх компаниа аврахын тулд бүхэл бүтэн банк дампууруулчихсан Б.Га­рам­гайбаатар мэтийн нөхөд улстөрд орвол Мон­голын эдийн засгийг яаж сам­­рах нь ойлгомжтой биз ээ.

Бид дараагийн удаа Б.Гарамгайбаатар “Анод”-оос ямар аргаар зээл авсан болон холбогдож байсан хууль бус үйлдлүүдийнх нь талаар мэдээлэх болно.

Б.Даваахүү

Эх сурвалж: “Өглөөний сонин”