Талбайн даварсан эзэд явган зорчигчоос төлбөр нэхэх вий
Нийслэлийн иргэдийг хамгийн их бухимдуулдаг нь зам, түүнтэй холбоотой асуудал гэхэд маргах хүн олон гарахгүй
болов уу. Замын түгжрэл иргэдийг өглөө, оройгүй бухимдуулна. Цаашилбал, авто зогсоол хэмээх “толгойны өвчин” өдөр бүр асуудал үүсгэнэ.
Хотын удирдлагууд авто зогсоолын асуудлыг шийдэх талаар өөрсдийн ажлаа хийсэн гэж үздэг. Ингэж үзэх ч үндэслэлтэй. Учир нь, Нийслэлийн Засаг дарга болон НИТХ-ын тэргүүлэгчдийн 2011 оны 80 дугаар тогтоолоор Нийтийн эзэмшлийн зам талбайд тээврийн хэрэгслийн төлбөртэй зогсоолын үйлчилгээг бий болгосон юм. Харин энэ тогтоолынхоо хэрэгжилт, байгуулсан авто зогсоолынхоо үйл ажиллагаанд хяналт тавих зэргийг ор тас мартсан гэлтэй.
Тэд эхний ээлжинд УДЭТ-ын өмнөх талбай, Хангарьд ордон, Спортын төв ордон зэрэг гурван байршилд төлбөртэй зогсоол байгуулсан. Өөрөөр хэлбэл, эдгээр зогсоол НИТХ-ын гаргасан дагаж мөрдөх журмын дагуу үйл ажиллагаа явуулдаг гэсэн үг.
Гэтэл зогсоол байгуулах зөвшөөрөл байхгүй, өөрийн дураар зогсоол бий болгож, иргэдээс төлбөр авах явдал олширчээ. Ялангуяа томоохон худалдааны төв, албан байгууллагуудын үүдэнд төлбөргүй зогсоол байна гэдэг үлгэр болжээ.
Тухайлбал, “Гранд” плазагийн авто зогсоолд хэдхэн минут зогсох төдийд 1000 төгрөг. “Орон зай” төвийн өмнөх талбай ч мөн адил. Цөөн тооны төлбөргүй авто зогсоол байх ч тухайн байгууллагын ажилчид өөрсдийн машинаа бүтэн өдөржин тавьчихна. Үүнээс болж иргэд нэгдүгээр эгнээ, орон сууцны орцны үүд, байшин барилгын булан тохойг бараадуулан машинаа тавьдаг. Энэ нь замын түгжрэл, ачааллыг нэмж, асуудал, бухимдал үүсгэдэг. Уг нь төлбөртэй зогсоолыг албан ёсны журмын дагуу байгуулбал эдгээр асуудал шийдэгдэх боломжтой. Харамсалтай нь дүрэм, журмыг дагадаг газар алга.
Журамд зааснаар тухайн төлбөртэй зогсоол батлагдсан зураг төслийн дагуу байгуулагдсан байх ёстой. Мөн төлбөр хураах зориулалтын төхөөрөмж байрлуулан, үйлчилгээнээс олсон орлогын 60 хувийг Авто замын санд төвлөрүүлж, зогсоолын тохижилтын асуудлыг бүрэн хариуцаж, шаардлагатай засвар үйлчилгээг цаг тухайд хийнэ хэмээн журамд заажээ. Мөн энд зогсоолын үнийг ч нарийн зааж өгсөн.
УДЭТ-ын өмнөх талбай, Хангарьд ордон, Спортын төв ордны зогсоолыг “Улаанбаатар зам ашиглалт, арч-лалт” компани хариуцдаг бөгөөд иргэдэд дараах тарифаар үйлчилдэг.
Автомашинаа 30 минут тавих бол 500 төгрөг, 30-60 минут бол 1000, 60-90 минут бол 1500 төгрөг, 90-120 минут бол 2000 төгрөгийн түрээс төлнө. Харин 120 минутаас хэтрүүлэн тавьсан тохиодолд цаг тутамд 3000 төгрөгийн торгууль төлдөг байна.
Гэтэл Соёлын төв өргөөний арын авто зогсоол цаг тутамд 1500 төгрөг, “Орон зай” төвийн зогсоол ороод, гарахад л 1000 төгрөг, Баянгол дүүргийн Татварын хэлтсийн гаднах талбай орох бүрт 500 төгрөг авах жишээтэй. Тэдний үзэж байгаагаар өөрийн эзэмшлийн нутаг дэвсгэр дээрх талбайд авто зогсоол байгуулах, хэдэн төгрөг авах зэрэг нь бүрэн эрхийн асуудал гэнэ.
“Орон зай” төвийн авто зогсоолын ажилтны хэлж буйгаар “Заавал стандарт, дүрэм журам баримталж, дагах шаардлагагүй. Цагдаад торгуулж байхаар энд төлбөрөө төлөх нь иргэдэд дээр” гэнэ. Нөгөө журамд зааснаар ажилчдын зориулалтын хувцас, төлбөр хураах төхөөрөмж, тохижилт гээчийг энэ зогсоолоос олж харсангүй. Мөнөөх журам энд огт үйлчилдэггүй бололтой.
Наранд зогсож халууцсандаа ч тэр үү, үйлчлүүлэгчдийг зандарсан, бухимдсан нэгнийг л олж харав. Тэр хүн машин оруулж, гаргах автомат хаалтыг орлодог бололтой юм. Машин орж гарах бүрт зэвэнд идэгдсэн урт гинжийг зөөж байрлуулж байлаа. Энэ мэт учир нь үл олдох, эмх замбараагүй байдалд анхаарлаа хандуулах цаг хэдийнэ болжээ.
Шинээр ашиглалтад орсон барилга, байгууламжийн эзэд байшингийнхаа ойр орчмын бүх талбайг “Манай эзэмшил” хэмээх болжээ. Энэхүү “хууль бус өмчлөл” энэ мэтээр газар авсаар байна. Даварсан “талбайн эзэд” нэг л өдөр явган зорчигчдоос төлбөр нэхэж эхлэх вий дээ.
Өглөөний сонин
URL:
