Дахиад л стандарт бус…
Автомашины дугаар стандарт бус байна гэж Замын цагдаагийн газар, авто тээврийнхэн замдаа таарсан машины дугаарыг дураараа хурааж байна. Стандарт бус байгаа нь гарцаагүй үнэн л дээ. Дугаарын тэмдгийн үсэг, тоо, хүрээ нь өнгийн бэлдэц дээр товойлгосон, өнгөөр ялгасан хийцтэй байх ёстой гэсэн үндсэн шаардлагаасаа хазайсан учраас хураахад нь буруутгах юм алга.
Автомашины дугаараас эхтэй энэхүү стандарт бус гэх үг газар авч халдварласаар стандарт бус Засгийн газар хүртэл байгуулагдав. Ийм Засгийн газраас стандарт бус шийдвэр гардгийг сүүлийн гурван жил гаруйн хугацаанд хангалттай нотолж байна. Тэр ч бүү хэл, стандарт бус авлигын хэргийг мөрдөгч олноороо “төрөх” боллоо. Халдварлаж байгаа нь энэ. Тодруулбал, “хүн хэлмэгдүүлэхгүй, хуулийн хүрээнд ажиллана” гэдгээ батлан тангарагласан АТГ-ын дарга Н.Ганболд, дэд дарга Б.Хурц нар стандарт бус мөрдөгчийг олноор нь төрүүлж буй хэрэг юм. Тэд АТГ хэмээх газрыг хүн танихтайгаа болтол нь цаг наргүй ажиллаж ирсэн мөрдөгч, гүйцэтгэх ажилтныг нэг л өдөр хоморголон халчихаад оронд тэтгэврийн өвгөн эсвэл амны салиа нь арилаагүй залуусаар сэлгэж байна.
Хоморголон халсан үйлдлээ Н.Ганболд нэгэн хэвлэлд ярихдаа “Найман хүнээ халсан юм биш, цомхотголд оруулсан. Тэгээд ч тэр хүнийхээ цаашдын хувь заяаг нь бодолцож цагдаад нь эргүүлэн өгөх тухай ярьж байна. Зургаан сарынх нь цалинг нь өгч байгаа” хэмээн бахдангуй ярьсан байна лээ. Хүнийг ажилгүй болгочихоод зургаан сарынх нь цалинг юун сүрхий тодотгоо вэ. Тэрээр найман хүнээ цомхотгосон гэх ч нэдэр дээрээ халагдах тушаал гардсан залуусын тоо 20 хүрээд байна. Ямар үндэслэлээр халав гэхээр ердөө энгийн. Шалгалт авсан, тэгэхэд унасан гэж хариулах. Хэн ч дургүй нэгнээ халснаа шалгалт нэрээр бамбайлан халхавчилж болно. Өдгөөгөөс хоёр жилийн өмнө улстөрч Д.Дорлигжав Улсын ерөнхий прокуророор томилогдоод удаагүй байхдаа прокурорын байгууллагад сэлгээ хийснийг санаж байна. Гэхдээ хөөрхий минь Н.Ганболд, Б.Хурц нар шиг ингэж хоморголон халаагүй. Даргыг цэрэг болгож, цэргийг дарга болгож өөрчилснөөс биш хүний ажил, амьдралыг орвонгоор нь өөрчилж албанаас нь хөөгөөгүй юм.
Гэтэл АТГ-ын дарга нар ярвигтай бөгөөд амаргүй “шинэ” албанд хоёргүй сэтгэлээр зүтгэсэн залуусыг ад үзсэн нь энэ. Авлигатай тэмцэх тухай хуулийн 17 дугаар зүйлд ингэж заасан байна. Авлигатай тэмцэх газрын зохион байгуулалтын бүтэц, орон тоог УИХ-аас батална гэж. Ингэхийн тулд халж, сэлгэхээсээ 45 хоногийн өмнө УИХ-д мэдэгдэх учиртай.
Гэтэл удирдлагаар нь томилогдоод хаалгаар нь шагайв уу, үгүй юу “Зайлаарай” хэмээн хэл амаар доромжилж үзэг цаас нийлүүлэн халах тушаалыг нь гаргав. Нөгөө Н.Ганболд даргын хэлсэнчлэн, цомхотгосон ажилтнаа цагдаад эргүүлэн өгөхөөр ярилцсан гэдэг нь хэвлэлд зориулсан үг болохоос биш үнэн бодит мэдээлэл биш бололтой дог. Учир нь цагдаагийн байгууллагынхан ч мөрдөгч нарт “Та нар сайн дураараа АТГ руу яваа биз дээ. Ажилд авах боломжгүй” гэсэн хариултыг өгөөд байгаа гэх. Мөрдөгчдөд нь ажил олдохгүй байхад нөгөө судалгаа, шинжилгээ хариуцсан ажилтнуудад олдоно бүр домог болох биз. Цомхотгоно гэдэг тухайн байгууллага бүтэц бүрэлдэхүүнээ цөөлөхийг хэлнэ. Тэгвэл цомхотгосон гэж тайлбарлачихаад эцэст нь халагдсан залуусын албанд Үндэсний аюулгүй байдлын зөвлөл, Тагнуулын ерөнхий газраас тэтгэвэрт гарсан буурай, учраа мэдэхгүй эрх зүйчдийг олноор нь авч байгаа юм билээ. Нөгөө хэд нь өнгөрсөн мягмар гаригт тангараг өргөжээ. Тэгвэл Төрийн албаны тухай хууль гэж бий. Тухайн ажил, мэргэжилдээ сонгон шалгаруултад тэнцэх эсэхийг нь шалгаж байж ажил албанд авах тухай тодорхой заасан. Гэтэл АТГ-ын удирдлагууд өөрсдийн гар, хөлөө албанд орсны чинь дараа шалгалт авчихъя хэмээн ихэд өгөөмөр хандаж байгаа юм байх. Энэ мэтчилэн хэвлэлийн хуудаснаа өдөр бүр АТГ-ыг тойрсон хууль бус үйлдлүүд нийтлэгдсээр байна. Энэ үед Төрийн албаны зөвлөлийнхөн ч мэдээллийг өлгөж аваад тус газарт шалгалт хийгээд сууж байх ёстой баймаар юм. Гэтэл АТГ-ын шинэ дарга нар өөрийг нь мөрдөж байсан, өмнөх даргын бууны нохой байж магадгүй гээд халсан гэх үйлдлийг нь хажуу айлын Дорж, Цэцэгээ хоёр ам зөрсөн аятай юм болгоод өнгөрч байна. АТГ-ын удирдлагууд 20 гаруй албан хаагчаа халлаа. Тэдний оронд сонгон шалгаруулалтгүйгээр өөрсдийн гар, хөлийг ажилд авав. Стандарт бус шийдвэрээ гэж…
Д.БОЛОРМАА
zuunii medee
URL:
