ИНЕГ-ынхан тендергүй ажил гүйцэтгүүлж хууль зөрчжээ
Иргэний нисэхийн ерөнхий газрын санхүү,
хөрөнгө оруулалтын тайлангаас багагүй “но” илэрсэн тул хууль, хяналтын байгууллагуудын хамтарсан ажлын хэсэг шалгаж эхэлжээ. Улсын төсвийн хөрөнгө оруулалтаар хийх ажлыг нисэхийн зардлаар хийж, түүнийгээ нөхөн гаргуулахаар бүрдүүлж өгсөн материалуудаас хэргийн сэжүүр илэрсэн бололтой. Ингэж үзэх үндэслэл нь УИХ-аас “ИНЕГ-ын санхүү, хөрөнгө оруулалтыг шалгаж үнэлэлт, дүгнэлт өгнө үү” гэсэн утгатай албан бичгийг холбогдох байгууллагуудад саяхан хүргүүлснээс тодорхой байна. Энэ дагуу ажлын хэсэг гарч шалгаж эхэлжээ. Мөн салбарын яаманд ч энэ тухай мэдээлэл очсон бөгөөд хөрөнгө оруулалтын тооцоо, судалгаа болон бусад тайлан мэдээг нягтлан тодруулж байгаа гэнэ.
Төсөв, санхүүтэй холбоотой энэ хэрэгт АТГ-ынхан тус газрыг өмнө нь удирдаж байсан С.Батмөнхийг буруутган шалгаж байгаа. Гэтэл үнэн хэрэгтээ С.Батмөнх буруутай бус харин ИНЕГ-ын зарим газрын дарга нар авлига авч, албан тушаалаа урвуулан ашигласан байж болзошгүй болжээ. Учир нь тус газрын Санхүү, төлөвлөлтийн хэлтсийн дарга Г.Наранцэцэг, Хөрөнгө оруулалт хариуцсан дэд дарга Ж.Чулуунбаатар нартай холбоотой асуудлуудын мөрөөр шалгалтынхан орсон бололтой. Хэргийн сэжүүр ийнхүү илэрч эхэлсэн ч ИНЕГ-ын дэд дарга Ж.Чулуунбаатар “Женко” Баттулгыг байхад та нар намайг яаж ч чадахгүй” хэмээн ханхалзаж яваа сурагтай. Гэтэл тэднээс өөр байгууллагын төсөв, хөрөнгийг мэддэг хүн үгүй. Ерөөс сүүлийн хэдэн жил тус газрын мөнгөний авдарт эзэн сууж, орлого, зарлагатай холбоотой асуудалд гарын үсэг зурж ирсэн хүмүүс нь Г.Наранцэцэг, Ж.Чулуунбаатар нар юм. Ажилтнуудын мэдүүлгээс цааш шалгах ёстой, авлигын шинжтэй хэд хэдэн асуудлыг ажлын хэсэг олж илрүүлсэн, заримыг мөрдөн шалгаж эхэлсэн гэх мэдээлэл дуулдаж байна. Тухайлбал, барилга угсралт, үйлдвэрлэл /гүйцэтгэлийн зардалд 136.7 сая /болон офиссын засвар /гүйцэтгэлийн зардалд 68.9 сая/ -ын ажилд гүйцэтгэгч компанийг тендер зарлалгүйгээр шууд сонгож нийт 200 сая төгрөг төсөвлөжээ. Ингэхдээ 17 сая төгрөгөөр үнэлэгдэх офиссын тавилгын үнийг гэхэд л нэг нугалж 36 сая гээд биччих хэмээн нугалаа гаргаж байсан тухай тус газрын ажилтнуудын дунд ам дамжсан яриа дуулддаг. Өндөр өртөгтэй дээрх хоёр ажлыг тендер зарлаж сонгон шалгаруулалт хийлгүйгээр хууль зөрчиж хувийн компанид өгсөн нь авлигын шинжтэй байж болзошгүй гэсэн хардлага ч байгаа юм байна. Энэ бол наад захын жижиг асуудал бол хөшигний ард шалгагдаж байгаа том хэргүүд удахгүй дуусах шатанд ороод байгаа нь хяналт, шалгалтынхны дүгнэлтээс ил болох бололтой.
Эх сурвалж: Зууны мэдээ
URL:
